नेपाल टेलिकमको १६ औं बार्षिकोत्सव सम्पन्न
नेपाल टेलिकमको १६ औं बार्षिकोत्सव सम्पन्न
२४ माघ २०७६ काठमाडौँ : नेपाल टेलिकमले आफ्नो स्थापनाको १६ औं बार्षिकोत्सव बुधबार विविध कार्यक्रमका साथ सम्पन्न गरेको छ । १६ औं बार्षिकोत्सवका अवसरमा सञ्चार तथा सूचना प्रविधिमन्त्री गोकुल बास्कोटा नेपाल टेलिकमको केन्द्रीय कार्यालय पुगी सम्बोधन गर्नु भएको थियो।
आयोजित कार्यक्रममा आफ्नो भनाई राख्दै माननीय सञ्चार तथा सूचना प्रविधि मन्त्री गोकुलप्रसाद बाँस्कोटाले नेपाल टेलिकमले पूर्व योजना बमोजिम नै ठूला आयोजना कार्यान्वयनमा प्राथमिकता दिएको तथा एक वर्षको अवधिमा फोरजी मोबाइल सेवा ७७ वटै जिल्लामा विस्तार गरेकोमा सञ्चार तथा सूचना प्रविधिमन्त्री गोकुल बास्कोटाले खुशी व्यक्त गर्नुभयो ।
सञ्चार तथा सूचना प्रविधिमन्त्री गोकुल बास्कोटाले एफटीटीएच प्रविधिको विस्तार र अप्टिकल फाइबर परियोजना निर्धारित अवधिमै सम्पन्न गर्नुपर्ने र कम्पनीले प्रदान गरेका सेवाहरुमा गुणस्तर कायम गरी सेवाग्राहीको सन्तुष्टिलाई प्राथमिकताको विषय बनाउनु पर्नेमा जोड दिनु भएको थियो ।
उक्त कार्यक्रमलाइ सम्बोधन गर्ने क्रममा सञ्चार तथा सूचना प्रविधि मन्त्रालयका सचिव तथा कम्पनीको सञ्चालक समितिका अध्यक्ष दीपक सुवेदीले टेलिकमले अब समयानुकुल विभिन्न स्मार्ट सेवाहरु वितरण गर्ने र अत्याधुनिक प्रविधिका सेवाहरु गुणस्तरसहित प्रदान गरी ग्राहकको मन जित्न झन् सफल हुने पर्ने बताउन भयो ।
सञ्चार तथा सूचना प्रविधि मन्त्रालयका सचिव तथा कम्पनीको सञ्चालक समितिका अध्यक्ष दीपक सुवेदीले यसका लागि बजारको प्रतिस्पर्धामा अब्बल ठहरिने गरी योजना कार्यान्वयन गरिने र ग्राहकलाई अझ गुणस्तरीय सेवा उपलब्ध गराइने बताउनु भएको थियो ।
नेपाल दूरसञ्चार प्राधिकरणका अध्यक्ष पुरुषोत्तम खनालले प्राधिकरणसँगको सम्झौता अनुसार एक वर्षको अवधिमा कम्पनीले ग्रामीण दूरसञ्चार विकास कोषको प्रयोग गरी विभिन्न स्थानमा अप्टिकल फाइबर बिछ्याउने कार्यमा हासिल गरेको उपलब्धिप्रति सन्तोष व्यक्त गर्दै पूर्ण क्षमतामा प्रयोग नभएका पूर्वाधारहरु सहप्रयोग गर्न पनि नेपाल टेलिकम तयार हुनुपर्ने सुझाव दिनुभयो ।
गएको १ बर्षमा संस्थाले थप्रै चुनौति भोग्दै सफलता हासिल गरेको नेपाल दूरसञ्चार कम्पनी लिमिटेडका प्रबन्ध निर्देशक डिल्लीराम अधिकारीले दावि गर्नु भएको थियो। नेपाल टेलिकमका प्रबन्ध निर्देशक डिल्लीराम अधिकारीले कम्पनीको समग्र अवस्था बिषयमा जानकारी गराउँदै सम्झौता भएको एक वर्षभित्रै देशभर फोरजी विस्तार गर्ने महत्वाकांक्षी र चुनौतीपूर्ण लक्ष्य अनुरुप यसै साताबाट देशका ७७ वटै जिल्लामा फोरजीको पहुँच पुर्याइएको बताउनु भएको थियो ।
नेपाल दूरसञ्चार कम्पनी लिमिटेडका प्रबन्ध निर्देशक डिल्लीराम अधिकारीले स्थानीय टेलिफोन सेवाको रुपान्तरणको लागि एफटीटीएच परियोजनालाई अगाडि बढाइएको र निकट भविष्यमा आईपीटीभी सेवा समेत एफटीटीएच मार्फत प्रदान गरिने बताउनु भयो ।नेपाल टेलिकमले वार्षिकोत्सवका अवसरमा ग्राहकका लागि विभिन्न छुट तथा अफर उपलब्ध गराएको छ।
कम्पनीको सञ्चालक समितिका सदस्य (कर्मचारी प्रतिनिधि) राजबहादुर रावलले कम्पनीका विभिन्न योजना कार्यान्वयनमा अझ प्राथमिकताका साथ लाग्नुपर्ने बताउँदै यसबीचमा संस्था र कर्मचारीको भलाईका लागि गरिएका कार्यहरु उल्लेख गर्नुभयो ।
कम्पनिले थप नयाँ सुविधाहरु र विशेषता समेटिएको नवीन अफिसियल वेबसाइट हिजैदेखि सार्वजनिक गरेको छ । कम्पनीको नयाँ वेबसाइट प्रयोग गरी कम्पनीद्वारा प्रदत्त सम्पूर्ण सेवाहरु सहजै प्रयोगमा ल्याउन, रिचार्ज गर्न, शुल्कहरु बुझाउन सहज हुनेछ ।
ग्राहक महानुभावलाई अतिरिक्त सुविधाहरु उपलब्ध गराउन कम्पनीले नबिल बैंकसँगको सहकार्य गरेको छ । नेपाल टेलिकमले नबिल बैंकसँगको सहकार्य सँगै मास्टर कार्ड, भिसा कार्डबाट नेपाल टेलिकमका मोबाइल सेवामा रिचार्ज गर्न तथा बिल भुक्तानी गर्न सकिने सुविधा ल्याएको छ ।
माननीय मन्त्री बाँस्कोटाले वार्षिकोत्सवको उपलक्ष्यमा प्रकाशित स्मारिका विमोचन समेत गर्नुभएको थियो । समारोहमा समितिका अध्यक्ष एवं सञ्चार तथा सूचना प्रविधि मन्त्रालयका सचिव दीपक सुवेदीले कम्पनीमा २० वर्ष सेवा अवधि पूरा गरेका कर्मचारीहरुलाई दीर्घ सेवा पदक तथा प्रमाणपत्र वितरण गर्नुभयो ।
त्यसैगरी कम्पनीको रिचार्ज सेवा तथा रिचार्ज कार्डको बिक्री लक्ष्य हासिल गर्ने थोक विक्रेता एवं कम्पनीका विभिन्न सेवाहरु प्रयोग गरी सर्वाधिक बिल भुक्तानी गर्ने संस्थागत तथा ब्यक्तिगत ग्राहकहरुलाई पनि कदर स्वरुप कार्यक्रममा सम्मान गरिएको थियो ।
